ԱՄՆ նախագահ Դոնալդ Թրամփը հայտարարել է, որ Խաղաղության խորհուրդը պատմական համաձայնության է եկել ՀԱՄԱՍ-ի և Գազայի հատվածում գտնվող այլ զինված խմբավորումների «լիակատար զինաթափման» վերաբերյալ։ Այս մասին գրում է BBC-ն։
ՀԱՄԱՍ-ի բարձրաստիճան պաշտոնյան BBC-ին ասել է, որ նրանք համաձայնության են եկել Գազայում լիակատար զինաթափման ծրագրի շուրջ, և որ շուտով պաշտոնական հայտարարություն կտարածվի։
Իսրայելը դեռևս չի մեկնաբանել այս տեղեկությունը։ Ամերիկացի պաշտոնյաները հեռախոսազրույցի ժամանակ լրագրողներին ասել են, որ Թրամփը «շատ հիասթափված» կլինի, եթե Իսրայելը հրաժարվի համաձայնագրից։
Լրագրողների հետ զրույցում ԱՄՆ-ի և Խաղաղության խորհրդի ներկայացուցիչները հայտարարել են, որ «իրականացման կոմիտեն» կհետևի զինաթափման գործընթացին։
Պաշտոնյան ընդունում է, որ ՀԱՄԱՍ-ի լիակատար զինաթափումը կարող է ավելի երկար տևել, քանի որ նրա բանակը, թունելները և արտադրական օբյեկտները ավելի շատ նման են պետական , քան զինյալ խմբի օբյեկտների։
ԱՄՆ-ի և Խաղաղության խորհրդի ներկայացուցիչները լրագրողներին ներկայացրել են զինաթափման գործընթացի հնարավոր ընթացքի մոտավոր ուրվագիծը։
Նրանք նշել են, որ նախ Գազայում ՀԱՄԱՍ-ի ոստիկանությունը կհանձնի իր զենքերը անցումային իշխանություններին։
Դրան կհաջորդի ծանր զենքը «շահագործումից հանելու գործընթացը», որը կներառի թունելների և պահեստների փակումը, ինչպես նաև այդ օբյեկտներում աշխատող մարտիկների հեռացումը։
Սա կլինի «շատ բարդ տեխնիկական գործընթաց», որի հիմնական հարցերից մեկը կլինի հավաքված զենքի անվտանգ պահպանումը։
Վերջապես, Գազայում գտնվող բոլոր անձնական զենքերը պետք է «լուծարվեն» պաղեստինյան օրենսդրության համաձայն։
Պաշտոնյաների խոսքով` այս գործընթացի շրջանակներում աշխարհազորայիններն ու կլանները նույնպես պարտավոր կլինեն հանձնել իրենց զենքերը։
Համաձայնագիրը ձեռք է բերվել «մի քանի ամիս տևած շատ դժվար բանակցություններից հետո», - ասել է Խաղաղության խորհրդի խոսնակը։
X-ում իր գրառման մեջ նա նշել է. «Այսօր համաձայնություն է ձեռք բերվել զինաթափման և Գազայի քաղաքացիական բնակչության համար անցումային շրջանի վերաբերյալ։ Եղավ մի քանի պահեր, երբ ես չէի հավատում, որ կարող ենք դա իրականացնել։
Կարևոր է այն, ինչ ասվում է համաձայնագրում։ Եվ ավելի կարևոր է, թե ինչ կլինի հետո։ Առջևում սպասվում է վերականգնված Գազա, որը կկառավարվի պաղեստինցիների կողմից և խաղաղության մեջ կլինի Իսրայելի հետ, ինչպես նաև քաղաքական հորիզոն՝ իսրայելա-պաղեստինյան հակամարտության իմաստալից լուծման համար։ Հենց դա էլ մենք հիմա անում ենք»։