ՇՐՋԱԲԵՐԱԿԱՆ ԹԻՒ 011 07 ՄԱՅԻՍ, 2025 Թ.
Հ.Յ.Դ. ՄԱՐՄԻՆՆԵՐԻՆ ԵՒ ԸՆԿԵՐՆԵՐԻՆ
Սիրելի՛ ընկերներ,
Տեղեկացնում ենք, որ «Երկիր Մեդիա» հեռուստաընկերութեան գործունէութիւնը դադարեցուել է 01 Մայիս, 2025 թուականից։
Կարծում ենք, որ որեւէ ընկերոջ համար գաղտնիք չէ, որ հեռուստաընկերութիւնը երկար տարիներ է, ինչ գտնւում է նիւթական ծանր կացութեան մէջ։ Իրարայաջորդ բիւրոները հսկայական ջանք են գործադրել լուծումներ գտնելու եւ հեռուստաընկերութիւնն այդ վիճակից դուրս բերելու համար, սակայն անցնող տարիների ընթացքում հեռուստաընկերութիւնը ո՛չ միայն չի յաջողել դառնալ ինքնաբաւ, այլ կուտակել է հսկայական պարտքեր։ Պարտքերի պատճառով առաջացել են իրաւական եւ բազմաթիւ այլ խնդիրներ։
Միւս կողմից հեռուստաընկերութեան հաղորդումների տեխնիկական որակը բարձրացնելու նպատակով անհրաժեշտ է արդիականացնել սարքաւորումները, որն իր հերթին պահանջում է նիւթական նոր եւ մեծ ներդրումներ։
Նկատի ունենալով, որ արդի դարում արմատապէս փոխուել են հաղորդակցութեան միջոցները եւ համացանցն ու ընկերային ցանցերը մեծ տեղ են գրաւում իւրաքանչիւր անհատի կեանքում, իսկ հեռուստաալիքները գրեթէ ամենուր նահանջի մէջ են, խիստ անհրաժեշտ է այդ իրականութիւնների ու Բ.-ի նիւթական վիճակի հիման վրայ մշակել նոր հայեցակարգ եւ յստակեցնել՝ թէ Հ.Յ.Դ. խօսքը ինչ միջոցներով պիտի լսելի դարձնել հանրութեանը։
Հիմք ընդունելով «Երկիր Մեդիա» հեռուստաընկերութեան կապակցութեամբ Հ.Յ.Դ. 35-րդ Ընդհանուր Ժողովի որոշումը, այն է. «Ստեղծել յատուկ աշխատանքային խումբ, որը կ՚ուսումնասիրի եւ առաջարկներ կը ներկայացնի «Երկիր Մեդիա» հեռուստաընկերութեան գործունէութեան արդիւնաւէտութեան բարձրացման ու տրամադրուող միջոցները ընդունելի նւազագոյնի հասցնելու ուղղութեամբ», նորընտիր Բիւրոն համապարփակ կերպով քննեց «Երկիր Մեդիա»-ի նիւթական եւ որակական հարցերը եւ որոշեց ժամանակաւորապէս դադարեցնել հեռուստաընկերութեան գործունէութիւնը, մարել բոլոր պարտքերը եւ յառաջիկայ ամիսների ընթացքում հանրային հաղորդակցութեան եւ քարոզչութեան մասնագէտների հետ խորհրդակցաբար մշակել Հ.Յ.Դ. Բիւրոյի քարոզչական նոր հայեցակարգ, որի մէջ պէտք է ներառուի նոր որակով «Երկիր Մեդիա»-ի յետագայ գործունէութեան հարցը։ Աշխատանքային խումբը արդէն իսկ սկսել է իր աշխատանքները։
Յաջողութիւ՛ն ձեր աշխատանքներին։
Ընկերական բարեւներով՝
Հ.Յ.Դ. ԲԻՒՐՕ
Խոսնակ Լրատվական