Քննչական կոմիտեի նախագահ Արթուր Պողոսյանի վստահեցմամբ՝ Փարաքարի սպանությունների դեպքերը բացահայտելու ուղղությամբ քննչական կոմիտեն կաշկանդվածություն չունի:
«Այլ հանցակիցներ լինելու մասով կատարում ենք քննություններ, որևիցե կաշկանդվածություն չունենք, ինչո՞ւ կամ ումի՞ց պետք է ունենանք այդ կաշկանդվածությունը»,- ԱԺ-ում նշել է նա ու հավելել, թե ՔԿ նախագահն այնպիսի տպավորություն ունի, որ որոշ մարդիկ այդ հանցագործության բացահայտումից նեղսրտել են։
Պողոսյանը հայտարարել է, թե այս գործը գտնվում է իր հսկողության տակ ու հանրությունը կստանա բոլոր հարցերի պատասխանները։
«Դժգոհ են մնացել, որ հանցագործությունը բացահայտվել է, քանի որ, եթե չբացահայտվեր, հնարավորություն էր տալու այլ հարցեր շահարկելու, հիմա վա՞տ է, որ բացահայտվել է: Եթե եղել է պատվիրատու՝ վստահ եղեք, որ բացահայտվելու է, մենք կներկայացնենք, թե ինչ գործողություններ ենք կատարել, դուք հաճելիորեն կզարմանաք»,- նշել է ՔԿ նախագահը:
Հիշեցնենք, որ Փարաքար խոշորացված համայնքի ղեկավար Վալոդյա Գրիգորյանը և նրա ընկերը, որը ոստիկան էր, սպանվել էին: Մեկ անձ էլ վիրավորում էր ստացել:
Դեպքը տեղի էր ունեցել սեպտեմբերի 23-ի կեսգիշերին:
Ավելի ուշ իրավապահները հայտնել էին, որ վերջիններիս սպանել և վիրավորել է 20-ամյա Գևորգ Հարությունանը, որը կալանավորվել է:
Ըստ իրավապահների՝ նրան այս գործում օժանդակել է Նարեկ Օհանյանը , որը ևս կալանավորվել է:
Նարեկ Օհանյանը փետրվարին Մերձանավում սպանված Գրիգոր Օհանյանի եղբայրն է: Մեղադրյալ Գևորգ Հարությունյանն իր ցուցմունքներում պնդել է, որ վրեժխնդրությունից դրդված է գնացել այս քայլին:
Մերձավանում տեղի ունեցած սպանության դեպքով Քննչական կոմիտեն մանրամասներ և լուսանկարներ էր հրապարակել: