Քրգործեր՝ Տավուշի համայնքներում կատարված առերեւույթ կոռուպցիոն չարաշահումների փաստերով

17:34 | 04.12.2019

Քրգործեր՝ Տավուշի համայնքներում կատարված առերեւույթ կոռուպցիոն չարաշահումների փաստերով

Տավուշի մարզի դատախազության դատախազի հանձնարարությամբ եւ  դատավարական ղեկավարման ներքո ՀՀ ոստիկանության Տավուշի մարզային վարչության Նոյեմբերյանի բաժնում  նախապատրաստվող նյութերով պարզվել է,  որ  ՀՀ Տավուշի մարզի Այրում համայնքի ղեկավարը, 2019թ. սկզբներին տեղեկանալով, որ Այրում բնակավայրի բնակիչը «Մշակույթի պալատի» հետնամասով անցնող ստորգետնյա գազատարի վրա ինքնակամ կառուցել է շինություն, նրա նկատմամբ դիտավորությամբ չի կիրառել վարչական իրավախախտումների վերաբերյալ օրենսդրությամբ նախատեսված վարչական պատասխանատվության միջոցներ: 

Բացի այդ Վանաձոր քաղաքի մի բնակչի թույլ է տվել օրինականացնել Այրում բնակավայրում գտնվող համայնքային նշանակության ստորգետնյա ջրատարի վրա ինքնակամ կառուցված կապիտալ շինությունը: Արդյունքում վերջինս ստացել է ՀՀ անշարժ գույքի նկատմամբ իրավունքների պետական գրանցման վկայական:

Նշված դեպքերի  առթիվ ՀՀ քրեական օրենսգրքի 308-րդ հոդվածի 1-ին մասի եւ ՀՀ քրեական օրենսգրքի 3152-րդ հոդվածի հատկանիշներով հարուցվել է քրեական գործ, որն ուղարկվել է ՀՀ քննչական կոմիտեի Տավուշի մարզային քննչական վարչություն` նախաքննություն կատարելու համար:

2019թ. նոյեմբերի 16-ին Իջեւան քաղաքում կանգնեցված եւ ՀՀ ոստիկանության Տավուշի մարզային վարչության Իջեւանի բաժնի հատուկ պահպանվող տարածք  տեղափոխված ԿԱՄԱԶ մակնիշի ինքնաթափ ավտոմեքենայում կրաքարի հայտնաբերման հանգամանքները պարզելու նպատակով Ոստիկանության Իջեւանի բաժնում նախապատրաստված նյութերով տվյալներ են ստացվել, որ ավտոմեքենան վարող անձը, չունենալով օրենքով սահմանված կարգով ընդերքի օգտագործման պայմանագիր,  տեւական ժամանակ հողափոր էքսկավատորի գործադրմամբ, Իջեւան քաղաքի Մետաղագործների թաղամասի վերջնամասում գտնվող կրաքարի պաշարներ պարունակող վայրից ապօրինի արդյունահանել է կրաքար:

Կրաքարի պաշարներ պարունակող վայրում կատարվել է դեպքի վայրի զննություն եւ պարզվել, որ արդյունահանված տարածքը ընդգրկում է շուրջ 3000 քմ. տարածք, ունի երկաստիճան շուրջ 15մ. խորություն, դեպքի վայրում առկա են երկու հողափոր էքսկավատոր: Քարի ապօրինի արդյունահանման ծավալները եւ դրա արդյունքում պետությանը պատճառված վնասը պարզելու համար գրություն է ուղարկվել ՀՀ բնապահպանության եւ ընդերքի տեսչական մարմին՝ մարկշեյդեր մասնագետների միջոցով համապատասխան չափագրումներ կատարելու համար:

Նկատի ունենալով, որ նախապատրաստված նյութերում առերեւույթ առկա են ընդերքի պահպանման եւ օգտագործման կանոնները խախտելու հանցավոր արարքների հատկանիշներ պարունակող տվյալներ՝ դեպքի առթիվ Տավուշի մարզի դատախազությունում հարուցվել է քրեական գործ՝ ՀՀ քրեական օրենսգրքի 291-րդ հոդվածի 2-րդ մասով: Քրեական գործի նախաքննության իրականացումը հանձնարարվել է ՀՀ ՔԿ Տավուշի մարզային վարչությանը: Սկսվել է նախաքննություն, որի ընթացքում կպարզվեն նաեւ տեւական ժամանակահատվածում իրականացված արդյունահանման փաստը համայքնային մարմինների կողմից չարձանագրելու եւ դրանից բխող համապատասխան միջոցներ չձեռնարկելու հանամանքները:

Ընդհանուր առմամբ ՀՀ Տավուշի մարզի դատախազության դատախազների դատավարական ղեկավարման կամ հսկողության ներքո ներկայումս քննվում է մարզի տարբեր համայնքների ղեկավարների, համայնքապետարանների պաշտոնատար աձանց եւ համայնքային ենթակայության հիմնարկների պատասխանատու անձանց կողմից կամ ներգրավմամբ առերեւույթ կատարված կոռուպցիոն բնույթի հանցավոր արարքներին առնչվող 12 քրեական գործ, եւս մեկ քրեական գործ մեղադրական եզրակացությամբ ուղարկվել է դատարան: Խոսքը, մասնավորապես, վերաբերում է մարզի Ազատամուտ, Աչաջուր, Արծվաբերդ, Վարագավան, Իջեւան, Կողբ, Կիրանց, Գանձասար, Խաշթառակ, Ծաղկավան, Լուսաձոր եւ Այրում համայքներին:

Նշված քրեական գործերի շրջանակներում համայնքի բնակիչների անուններով որպես օգնություն համայնքի բյուջեից գումարների տրամադրման, պետական ծրագրերով գյուղացիական տնտեսություններին սերմացու ցորենի հատկացման գործընթացում  հափշտակություններ կատարելու, առանց աշխատանքային պարտականությունների կատարման՝ պաշտոնեական կեղծիք կատարելու միջոցով անձանց աշխատավարձեր հատկացնելու եւ այդ գումարները յուրացնելու, վատնելու, ինքնակամ կառուցապատումները չվերացնելու, վարչական պատասխանատվության միջոցներ չկիրառելու, հողամասերի ինքնակամ զավթումները, ապօրինի շինարարությունները դիտավորությամբ չդադարեցնելու եւ այլ հանցավոր արարքներ առերեւույթ կատարելու համար մեղադրանքներ են առաջադրվել նշված համայնքների թվով 7 պաշտոնատար անձանց  (այդ թվում՝ համայնքների 4 նախկին ղեկավարների): Քրեական այս գործերով պետությանը պատճառված ընդհանուր վնասը կազմել է ավելի քան 44մլն ՀՀ դրամ: Պատճառված վնասները վերականգնելու նպատակով բոլոր դեպքերում մեղադրյալների գույքի վրա կիրառվել են արգելանքներ:

Բաժնի այլ լուրեր

Օրակարգ

Միակ Էկոնոմ դասի ավտովարձույթը Հայաստանում

Գովազդային տարածք