Հասարակությունը հասցրել է զզվել դիլետանտների կառավարումից. ժամանակն է, որ տեսնի փորձառու, աշխարհի վարքուբարքին ծանոթ անհատների

18:45 | 17.09.2019

Հասարակությունը հասցրել է զզվել դիլետանտների կառավարումից. ժամանակն է, որ տեսնի փորձառու, աշխարհի վարքուբարքին ծանոթ անհատների

Իշխանություններն այս մեկուկես տարվա ընթացքում այնքան սխալներ թույլ տվեցին, որ եթե 15 տարի զօրուգիշեր քննադատենք չի վերջանա։ Բայց նրանք ովքեր գիտակցում են, թե մեզ ինչ արհավիրք է սպասվում այս իշխանությունների «հովանու» ներքո, հարց են տալիս՝ իսկ մենք այդ 15 տարին ունե՞նք, որ առոք փառոք նստենք օթյակի փափուկ բազկաթոռին ու վերամբարձ կարծիքներ հայտնելով դիտենք, թե արենայում ինչ մարտեր են գնում նախկինների ու ներկաների միջև։ Մեր երկրի ճակատագիրն է որոշվում ամեն օր, ու եթե այս իշխանություններն այլևս չափազանց թույլ են ու ռեսուրս չունեն արդյունավետ ու արդար կառավարելու, բայց բավարար ուժ ունեն ձախողումների մեջ նախկիններին մեղադրելով վարչական ռեսուրսով նրանց շարքից հանելու, այդ դեպքում այս վակուումն ո՞վ է լցնելու, ինչի՞ն ենք սպասում։

Գաղտնիք չէ, որ վերջին երեք տասնամյակում քաղաքական օրակարգ թելադրել են օրվա իշխանությունները, իսկ ընդդիմադիր ուժերը մշտապես գնացել նույն տրորված արահետով՝ իշխանությունն ինչ անի՝ քննադատենք, եթե ոչինչ չանի՝ քննադատենք, որ ոչինչ չի անում։ Ու չպետք է մոռանալ, որ երբեք ընդդիմությունը միատարր չի եղել, ու օբյեկտիվորեն չպետք է լինի․ տարբեր գաղափարների կրող են, աշխարհաքաղաքական տարբեր կողմնորոշումների ջատագով, ինչու չէ, ոմանք՝ աշխարհի ուժի տարբեր կենտրոնների շահերի սպասարկող։ Սա է պատճառը, որ ընդդիմադիրներն ավելի շատ իրար հետ են հակասություն ունեցել, քան իշխանության, ու ամեն մեկը կարծել է, որ հենց ինքն ու իր ուժն է ազգի փրկիչը, ու եթե իրենց շուրջ չեն համախմբվելու, ապա իշխանափոխությունն անիմաստ է։ Հո չե՞նք պատրաստվում նույն սխալն անել հիմա, այսքան փորձուփորձանքը վերաարժևորելուց հետո։ Փաշինյանն իր թիմով ոչնչի առաջ կանգ չառնելով վերցրեց իշխանությունը՝ խաղալով հասարակության նուրբ թելերի վրա, ճամփա փակելով, մերժելով, «ընդդեմ»-ով, ընդդիմախոսների սև ժապավենները կախելով, ահաբեկելով, անգամ տների վրա մարդկանց ուղարկելով։ Իսկ «հանուն» կոչերն այնքան անիրատեսական էին, որ դրանց կատարման անհնարինությունը պարզ դարձավ այս իշխանությունների պաշտոնավարման առաջին իսկ օրերից։

Բայց Փաշինյանին հաջողվեց գալ իշխանության, երբ իր քաղաքական օրակարգը պարտադրեց հանրությանը, այն ժամանակ, երբ նախկիները փոխել էին Սահմանադրությունը, հաղթել էին ընտրություններում, ստացել հնարավորություն հավերժ իշխելու, թեպետ համեստորեն համաձայնել էին քսան տարվան։ Հաղթանակի բերկրանքը վայելելու ու իրենց անպարտելիության մասին ազդարարելու պահին իրենց դեմ օգտագործվեց անսպասելիության գործոնն ու երկրում տեղի ունեցավ մի մասի կարծիքով հեղափոխություն, մյուսի կարծիքով իշխանազավթում, իմ կարծիքով՝ ընդամենը իշխանափոխություն՝ ոչ մի կոնստրուկտիվ էլեմենտ չպարունակող գործելաոճով, երկրի զարգացման տեսլականի իսպառ բացակայությամբ։ Իհարկե, դասական առումով երեկվա իշխանությունն այսօրվա ընդդիմությունն է ու վաղվա իշխանությունը, բայց ոչ մեր պարագայում։ Երեկվա իշխանությունն ուզում է վերադառնալ՝ մերժելով մերժողին, ասել է թե՝ դարձյալ «ընդդեմ»-ով, գալ ու ժապավեն փակցնողների ժապավենները փակցնել, իրենց բանտ նետողներին բանտերը նետել։ Այսօր կռիվ է գնում անցյալի համար ու ուզում են հավատանք, որ հաղթողը մեզ պայծառ ապագա՞ է տանելու։

Կարծում եմ ժամանակն է մտածել, որ քաղաքական բեմահարթակում իրենց արժանապատիվ տեղը զբաղեցնեն այն ուժերը, որոնք գալիս են հանուն մեր երկրի զարգացման, ունակ են իրենց օրակարգը առաջարկելու հանրությանն ու պարտադրելու իշխանություններին, ասել է թե՝ «խաղալ սպիտակներով»։ Կառուցողական ընդդիմությունը բնականաբար կներկայացնի երկրի զարգացման իր հստակ ու իրատեսական ծրագիրը, որպեսզի մեր հասարակությունը, որ հասցրեց այս կարճ ժամանակում զզվել դիլետանտների կառավարումից, տեսնի փորձառու, աշխարհի վարքուբարքին ծանոթ անհատների, որոնք ունակ են կյանքի կոչելու հասարակության վստահության արժանացած իրենց ծրագրերը։ Նախկինները ոչ միայն երեկ էին մերժելի՝ որպես իշխանություն, այլև այսօր՝ որպես ընդդիմություն, մեզ նոր որակի ընդդիմություն է հարկավոր, որում իրենց պատկառելի տեղը կունենան նաև նախկին փորձառու որոշ գործիչներ՝ ապագայի ծրագրերով տոգորված, այլ ոչ թե անցյալը վերականգնելու մոլուցքով տառապող։

Բաժնի այլ լուրեր

Լրահոս

Միակ Էկոնոմ դասի ավտովարձույթը Հայաստանում

Գովազդային տարածք