Տղամարդը շինարարական ապրանքներ գնելու և շինաշխատանքներ կատարելու համար գումար է վերցրել, սակայն աշխատանքը չի կատարել. ՔԿ

15:56 | 09.08.2019

Տղամարդը շինարարական ապրանքներ գնելու և շինաշխատանքներ կատարելու համար գումար է վերցրել, սակայն աշխատանքը չի կատարել. ՔԿ

ՀՀ քննչական կոմիտեի ԵՔՔՎ Շենգավիթ վարչական շրջանի քննչական բաժնում քննվող քրեական գործով միջոցներ են ձեռնարկվում՝ պարզելու առերևույթ խարդախություն կատարած անձի ինքնությունը։ Այս մասին հայտնում են ՔԿ-ի տեղեկատվության 
և հասարակայնության հետ կապերի բաժնից:

2019թ. հուլիսի 10-ին ՀՀ ոստիկանության Շենգավիթի բաժնում քաղաքացուց հաղորդում է ստացվել այն մասին, որ հուլիսի 3-ին ենթադրյալ հանցագործություն կատարած անձը շինարարական ապրանքներ գնելու և շինարարական աշխատանքներ կատարելու համար իրենից  պահանջել և ստացել է գումար, սակայն չի գնել նշված ապրանքները, չի կատարել շինարարական որևէ աշխատանք՝ տարբեր պատճառաբանություններով չվերադարձնելով իրենից վերցված գումարը:

Դեպքի առթիվ ՀՀ ոստիկանության Շենգավիթի բաժնում հարուցվել է քրեական գործ՝ ՀՀ քրեական օրենսգրքի 178-րդ հոդվածի 1-ին մասի հատկանիշներով, որով նախաքննությունն իրականացվում է ՀՀ քննչական կոմիտեի ԵՔՔՎ Շենգավիթ վարչական շրջանի քննչական բաժնում:

Նախաքննության ընթացքում պարզվել է, որ քաղաքացին առերևույթ հանցագործություն կատարած անձի հետ ծանոթացել է սոցիալական կայքերից մեկում տեղադրված հայտարարության միջոցով, և հնարավոր է, որ նշված անձի գործողություններից  տուժած լինեն նաև այլ անձինք:

Քրեական գործով բազմակողմանի, օբյեկտիվ և լրիվ քննությունն ապահովելու նպատակով միջոցներ են ձեռնարկվում՝ լուսանկարում պատկերված անձին հայտնաբերելու ուղղությամբ:

ՔԿ-ից խնդրում են լուսանկարում պատկերված անձին ներկայանալ վարույթն իրականացնող մարմնին, կամ ովքեր ճանաչում են նրան, որևէ տեղեկություն ունեն նրա ինքնության կամ գտնվելու վայրի մասին, հայտնեն ՀՀ քննչական կոմիտեի ԵՔՔՎ Շենգավիթ  վարչական շրջանի քննչական բաժին:

Բաժնի այլ լուրեր

Լրահոս

Միակ Էկոնոմ դասի ավտովարձույթը Հայաստանում

Գովազդային տարածք